Professionele en bekostigbare onafhanklike publikasie van manuskripte



Turksvy Publikasies



Elke skrywer droom daarvan om sy of haar eie boek vas te hou. Uitgewers word oorval met manuskripte en kan slegs ’n klein persentasie daarvan uitgee. Só gaan goeie werke wat vir publikasie voorgelê word, verlore. Ongelukkig is die ander kant van die munt ook waar: Dit is deesdae maklik om goedkoop en sonder professionele hulp ’n boek die lig te laat sien. Daar is derduisende boeke op die mark wat onafgerond is en wemel van foute. Dit is waar Turksvy Publikasies se waarde lê. Dié uitgewery is deur kundiges in die skryfarena op die been gebring om skrywers by te staan om hulle werk onafhanklik en bekostigbaar te publiseer, maar terselfdertyd te waarborg dat die boek professioneel en sonder foute aan lesers gebied word. Met bewese ervaring in skryfkuns, digkuns, redigering, taalversorging en joernalistiek is Turksvy Publikasies die aangewese span om met jou manuskrip te vertrou: fiksie en nie-fiksie. Dit kan insluit romans, digbundels, kortverhale, sketse, rubrieke, memoires, jeug- en kinderverhale.



Wat bied Turksvy Publikasies?



Ons uitgangspunt is deurgaans om nie bloot uit te gee wat aan ons gebied word nie, maar om stap vir stap saam met die skrywer ’n pad te loop om die manuskrip sowel as die skrywer se vaardigheid te ontwikkel om 'n goeie produk te lewer. Dit word in twee dele gedoen. Die eerste deel behels die ontwikkeling en versorging van die teks. Die tweede deel behels die produksie.



Ontwikkeling en Versorging



Evaluering van manuskrip





Ons sal enige manuskrip wat aan ons voorgelê word teen ’n geringe koste evalueer en ’n kort verslag aan die skrywer stuur om aan te dui of dit publiseerbaar is al dan nie. Die verslag sal voorstelle bevat as basis om die manuskrip te verbeter indien dit nie aanvanklik geskik is vir publikasie nie.



Redigering en manuskripontwikkeling





Indien ’n manuskrip meriete het, sal ’n redakteur met die skrywer konsulteer om dit te ontwikkel en verfyn. Hier word onder meer gekyk na elemente soos die ontwikkeling van die storielyn en karakters, dialoog, struktuur en konteks. Met redigering word aandag gegee aan feitelike korrektheid, deurlopende konsekwentheid, geloofwaardigheid en ’n hele aantal ander slaggate wat ’n verhaal of gedig kan laat struikel.



Proeflees en taalversorging





Hier word die dienste van bekwame taalversorgers en proeflesers gebruik om seker te maak jou teks is foutloos. Spelling, leestekens, sinstruktuur en taalfoute word nagegaan en gekorrigeer. Hierdie uiters belangrike aspek word dikwels afgeskeep deur mense wat verkies om hulle eie werk uit te gee. Dis dan dat ’n boek vol foute op winkelrakke beland. Met Turksvy Publikasies is daar nie kortpaaie nie – die manuskrip moet sonder foute uitgegee word.



Produksie



Setwerk en uitleg





Die uitleg van die manuskrip en setwerk word deur professionele mense gedoen om te verseker die teksgrootte, bladuitleg en lettertipe is op standaard en gemaklik op die leser se oog.



Omslagontwerp





’n Boek se voorblad, rugkant en agterplatteks moet visueel stimuleer en die leser as ’t ware uitnooi om die boek te koop. Vir hierdie doel gebruik Turksvy Publikasies ook kundiges en hou die voorstelle en indrukke van die skrywer in gedagte.



ISBN-registrasie





Turksvy Publikasies doen aansoek vir ’n ISBN-nommer vir elke publikasie en voorsien ook elke boek van ’n strepieskode wat vereis word vir die verkoop van boeke in boekwinkels en aanlyn.



Drukkers toe





Turksvy Publikasies onderhandel met verskeie drukkers om die beste prys vir die skrywer te bekom en is deurentyd in verbinding met die maatskappy totdat die finale produk gelewer word.



Professionele webtuiste





Sommige skrywers wil graag hulle eie webtuiste ontwikkel vir meer blootstelling en professionaliteit. Turksvy Publikasies kan ook hiermee behulpsaam wees.



Waarom Turksvy Publikasies se dienste gebruik?



Soos reeds genoem, word groot en tradisionele uitgewers met manuskripte oorval en derhalwe kan dit maande duur voordat jy weet of jou manuskrip aanvaar word of nie. Sou dit aanvaar word, is jy kontraktueel tot die uitgewer verbind en die proses uit jou hande. Baie skrywers verkies om nie hierdie pad te loop nie. Hulle wil eerder self in beheer wees van hulle werk en dan natuurlik ook self kan bepaal wat hulle inkomste uit ’n boek sal wees. Om egter die sogenaamde selfpublikasie-roete te volg, is ’n pad vol slaggate. Met Turksvy Publikasies word dié slaggate vermy en word ’n boek van dieselfde gehalte as dié van enige bekende uitgewer aan skrywers en lesers gebied.



Hoe gaan ek te werk om my boek aan Turksvy Publikasies voor te lê en wat gaan dit my kos?





Die proses is eenvoudig en behels slegs drie stappe:



Een





Stuur jou manuskrip met ’n dekbrief aan: turksvypublikasies@gmail.com



Twee





Turksvy sal ontvangs erken en jou binne sewe dae laat weet of die manuskrip geskik is vir publikasie. Indien die manuskrip nie in die huidige weergawe geskik is vir publikasie nie sal 'n verslag teen ’n geringe fooi opgestel word om aan te dui wat die tekortkominge is waaraan aandag gegee moet word.



Drie





Sodra die skrywer aandui dat daar met die proses voortgegaan kan word, word ’n kwotasie gestuur waarin elke stap en die koste daaraan verbonde uiteengesit word



Verbeter jou skryfkuns met Turksvy Publikasies se omvattende skryfkursus



Turksvy Publikasies het ’n skryfkursus ontwikkel om aspirantskrywers te lei om die korrekte gereedskap te gebruik om skryftalent te slyp as ’n aanvanklike poging nie publiseerbaar is nie. ’n Bekostigbare skryfkursus wat skrywers op hulle eie tyd aan die hand van spesifieke opdragte en riglyne voltooi, word aangebied. Daar word onder andere gekyk na kwessies soos karakter-ontwikkeling, boeiende storielyne, ontwikkeling van lewendige dialoog, showing and telling asook tegniese aspekte in die aanbieding van ’n manuskrip.



Ons sal graag van jou wil hoor
Kontak ons gerus










STUUR >



Tel: 083 467 1522
E-pos: turksvypublikasies@gmail.com